જામનગર બન્યું સૌરાષ્ટ્રનું વુહાન: પોઝીટીવ કેસનો આંક 700 ને પાર

જામનગર શહેરમાં પણ કોરોના 400 ને કુદાવી ગયો: ગ્રામ્ય વિસ્તારમાં પણ કોરોના 300 ને પાર: કુલ 721 કેસ સામે 615 દર્દી સ્વસ્થ થયાં: 24 કલાકનો સત્તાવાર કોવિડ મૃત્યુંઆંક 17

જામનગર તા.28:

જામનગરમાં કોરોનાના કેસે પાછલા તમામ રેકર્ડ તોડીને ગઇકાલે 700 ની સપાટી કુદાવી હતી. જામનગર શહેરમાં 407 તથા જામનગર ગ્રામ્યમાં 314 નવા કેસ નોંધાયા હતાં. 721 કેસ સામે શહેરના 353 અને ગ્રામ્યના 262 મળીને કુલ 615 દર્દીઓ ગઇકાલે કોરોનાને મ્હાત આપી ડિસ્ચાર્જ થયા હતાં.

જામનગર જિલ્લામાં કોરોનાના મૃત્યુના મામલે ભયાનક સ્થિતિ છે. કોરોનાની સારવાર દરમિયાન દર 10 મિનિટે 1 વ્યક્તિ કોરોનાની સારવારમાં ટપોટપ મૃત્યુ પામી રહયા છે. જામનગર શહેરમાં કોરોનાનાં કેસનો આંકડો ગઇકાલે ચારસોને પાર થયો હતો અને 407 કેસ નોંધાયા હતાં. તેમજ ગ્રામ્યનો આંકડો ગઇકાલે  પ્રથમ વખત 300 ને વટાવી રેકોર્ડ બ્રેક 314 પોઝિટિવ કેસ નોંધાતાં વહીવટી તંત્રની ચિંતામાં વધારો થયો છે.

 જામનગર મહાનગરપાલિકા અને જિલ્લા પંચાયતની આરોગ્ય શાખા દ્વારા ટેસ્ટિંગ ની પ્રક્રિયા પણ વધારી દેવામાં આવી છે, અને સમગ્ર જિલ્લાભરમાં 5,67,579 જેટલા કોરોના ટેસ્ટિંગ કરી લેવામાં આવ્યા છે.

જામનગર શહેરમાં ગઇકાલે 3878 લોકોનો કોરોના ટેસ્ટ કરવામાં આવ્યો હતો. આ સાથે શહેરમાં થયેલ કુલ ટેસ્ટનો આંક વધીને 3,21,914એ પહોંચ્યો હતો. જામનગરમાં ગઇકાલે 24 કલાકના સૌથી વધુ કહી શકાય તેટલા 407 કેસ નોંધાયા હતા. પરંતુ તેની સામે 353 દર્દીઓ સ્વસ્થ થયા હતા. ગઇકાલે  શહેરના 9 દર્દીઓના મૃત્યું કોરોનાથી થયાનું જાહેર કરાયું હતું. આ સાથે શહેરનો સત્તાવાર કોવિડ મૃત્તકઆંક વધીને 77 એ પહોંચ્યો હતો.

જામનગર ગ્રામ્ય વિસ્તારમાં ગઇકાલે 1677 લોકોનો કોરોના ટેસ્ટ કરવામાં આવતા તેમાંથી 314 પોઝિટિવ કેસ નોંધાયા હતાં. ગ્રામ્યમાં કુલ ટેસ્ટનો આંક 245665 એ પહોંચ્યો હતો. જામનગર ગ્રામ્યમાં પણ 24 કલાના સૌથી વધુ પોઝીટીવ કેસ ગઇકાલે નોંધાયા હતાં. ગ્રામ્યમાં ગઇકાલે 262 દર્દીઓ સ્વસ્થ થયા હતાં. જ્યારે ગ્રામ્યના 8 દર્દીના મૃત્યું નિપજ્યાંનું જાહેર કરાયું હતું. તેથી ગ્રામ્યનો કોવિડ મૃત્યુંઆંક 58 એ પહોંચ્યો હતો.

સમગ્ર જિલ્લામાં કોરોના સંક્રમિત દર્દીઓનો આંકડો 21,000 થી વધુનો થયો છે કુલ 21,183 લોકો કોરોના સંક્રમિત થયા છે. સાથોસાથ મૃત્યુનો દર પણ ખૂબ જ વધી ગયો છે અને અત્યાર સુધીમાં કોરોના ના કારણે 2,600 થી વધુ દર્દીઓ કોરોનાની સારવાર દરમિયાન મૃત્યુ પામ્યા છે. ઉપરાંત છેલ્લા 24 કલાક દરમિયાન જામનગર શહેરના 253 અને ગ્રામ્યના 262 મળી 615 દર્દીઓને રજા આપવામાં આવી છે.

ગઇકાલે કોરોનાના પોઝીટીવ કેસનો આંક રેકર્ડબ્રેક હતો પરંતુ એક મોટી બાબત કે જે તંત્ર માટે અને લોકો માટે રાહતરૂપ કહી શકાય તેવી એ હતી કે 615 દર્દીઓ સાજા થઇને ગઇકાલે ડિસ્ચાર્જ થયા હતાં.