અમંગળ વાર: જામનગરમાં કોરોનાના અધધ..697 કેસ

શહેર અને ગ્રામ્ય વિસ્તારમાં સર્વાધિક કેસ: શહેરમાં 398 કેસ સામે માત્ર 163 દર્દી અને ગ્રામ્યમાં 299 કેસ સામે 282 દર્દી સ્વસ્થ થયા: શહેરના 8 અને ગ્રામ્યના 7 દર્દીનું મૃત્યું જ કોરોનાથી થયાનું જાહેર

જામનગર તા.28:

જામનગરમાં ગઇકાલનો દિવસ કોરોનાની દ્રષ્ટિએ અમંગળ સાબિત થયો હતો. ગઇકાલે મંગળવારે કોરોનાના અત્યાર સુધીના 24 કલાકના સૌથી વધુ 697 કેસ નોંધાયા હતા. આ સામે 445 દર્દીઓએ કોરોનાને મ્હાત આપી હતી. આરોગ્ય તંત્ર દ્વારા ગઇકાલે માત્ર 15 દર્દીના મૃત્યું જ કોરોનાથી થયા હોવાનું જાહેર કરવામાં આવ્યું હતું.

જામનગર જિલ્લામાં કોરોના ના મૃત્યુ ના મામલે ભયાનક સ્થિતિ છે. કોરોનાની સારવાર દરમિયાન દર 10 મિનિટે 1 વ્યક્તિ કોરોના ની સારવાર માં ટપોટપ મૃત્યુ પામી રહયા છે. જામનગર શહેરમાં કોરોનાનાં કેસનો આંકડો આજે ચારસો ની નજીક પહોંચ્યો છે. અને 398 કેસ નોંધાયા છે, તેમજ ગ્રામ્ય નો આંકડો  ગઇકાલે  પણ 300 ની નજીક પહોંચી ગયો છે, અને રેકોર્ડ બ્રેક 299 પોઝિટિવ કેસ નોંધાતાં વહીવટી તંત્ર ચિંતામા મુકાયું છે.

 જામનગર મહાનગરપાલિકા અને જિલ્લા પંચાયતની આરોગ્ય શાખા દ્વારા ટેસ્ટિંગ ની પ્રક્રિયા પણ વધારી દેવામાં આવી છે, અને સમગ્ર જિલ્લાભરમાં સાડા પાંચ લાખથી વધુ કોરોના ટેસ્ટિંગ કરી લેવામાં આવ્યા છે.

જામનગર શહેરમાં ગઇકાલે 3442 લોકોનો કોરોના ટેસ્ટ કરવામાં આવ્યો હતો. આ સાથે શહેરમાં થયેલ કુલ ટેસ્ટનો આંક વધીને 3,18,036એ પહોંચ્યો હતો. જામનગરમાં ગઇકાલે 24 કલાકના સૌથી વધુ કહી શકાય તેટલા 398 કેસ નોંધાયા હતા. પરંતુ તેની સામે માત્ર 163 દર્દીઓ જ સ્વસ્થ થયા હતા. ગઇકાલે  શહેરના 8 દર્દીઓના મૃત્યું કોરોનાથી થયાનું 

શહેરમાં 398 પોઝિટિવ કેસ નોંધાયા હોવાથી જામનગર શહેરનો કુલ કોરોના પોઝિટિવ દર્દીઓનો આંકડો 13,812 નો થયો છે. જ્યારે ગ્રામ્ય વિસ્તારમાં ગઇકાલે 1,884 લોકોનો કોરોના ટેસ્ટ કરવામાં આવતા તેમાંથી 299 પોઝિટિવ કેસ નોંધાયા હોવાથી જામનગર ગ્રામ્યનો કુલ આંકડો 6,442 નો થયો છે. અને સમગ્ર જિલ્લામાં કોરોના સંક્રમિત દર્દીઓનો આંકડો 20,000થી વધુનો થયો છે કુલ 20,462 લોકો કોરોના સંક્રમિત થયા છે. સાથોસાથ મૃત્યુનો દર પણ ખૂબ જ વધી ગયો છે અને અત્યાર સુધીમાં કોરોના ના કારણે 2,545 થી વધુ દર્દીઓ કોરોના ની સારવાર દરમિયાન મૃત્યુ પામ્યા છે. ઉપરાંત છેલ્લા 24 કલાક દરમિયાન જામનગર શહેરના 163 અને ગ્રામ્યના 283 મળી 445 દર્દીઓને રજા આપવામાં આવી છે.