જામનગરમાં 12 થી 14 વર્ષના બાળકોને કોવિડ વેક્સિન આપવાનો પ્રારંભ

જામનગર તા.16

જામનગર જિલ્લામાં આજે બુધવારથી 12 થી 14 વર્ષના બાળકો માટે કોરોના વેકસીન આપવાની કામગીરીનો પ્રારંભ કરવામાં આવ્યો છે. શહેરના આશરે 24 હજાર જેટલા બાળકોને કોરોના પ્રતિરોધક વેકસીન બખ્તરથી સજ્જ કરવાનો લક્ષ્યાંક નીર્ધારવામા આવ્યો છે. આ કોવીડ વેક્સીનેશનનો આજે કામદાર કોલોની આરોગ્ય કેન્દ્ર ખાતેથી મેયર સહિતના અગ્રણીઓ હસ્તે પ્રારંભ કરવામાં આવ્યો હતો પરંતુ ઉદ્ઘાટન વેળાએ એક પણ બાળક વેકસીન લેવા હાજર ન થતા કાર્યક્રમનો ફિયાસ્કો થયો હતો અને અગ્રણીઓ ફોટો સેશનની ભૂખ ભાંગી રવાના થયા હતા.

સરકારની સૂચનાને અનુસાર રાજયમાં 12 થી 14 વર્ષ સુધીની ઉંમરના બાળકોને કોરોના વેકસીન આપવા માટેનું આયોજન કરાયું છે જેના પગલે જામનગરમાં પણ આજે તા. 16/03થી 12 થી 14 વર્ષ સુધીની ઉમર ધરાવતા બાળકો ને કોરોના વેકસીન આપવાની શરૂઆત કરવામાં અવી હતી. જેમાં 12 થી 14 વર્ષ સુધીની ઉંમર ધરાવતા જામનગર શહેરના આશરે 24,000થી વધુ બાળકો નોંધાયા છે.

બાળકો માટેના આ રસીકરણ અભિયાનનો આજે 11: 30 વાગ્યાના સમયગાળા દરમિયાન શહેરના કામદાર કોલોની આરોગ્ય કેન્દ્ર ખાતે જામનગરના મેયર બીનાબેન કોઠારી, સ્ટેન્ડીગ કમિટીના ચેરમેન મનીષભાઈ કટારીયા, કમિશ્નર વિજયકુમાર ખરાડી, શાશક પક્ષના નેતા કુશુમબેન પંડ્યા સહિતના આગેવાનોની હાજરીમાં પ્રારંભ કરવામાં આવ્યો હતો. ગજબ તો ત્યારે થઈ ગઈ જ્યારે ઉદ્ઘાટન વેળાએ એક પણ બાળક રસી લેવા ન આવ્યો! જેને લઈને ઉપસ્થિતોમાં આશ્ચર્ય સર્જાયું હતું. બાળકોની ગેરહાજરીને પગલે કાર્યક્રમનો ફિયાસકો ઉપસ્થિત અધિકારીઓ, પદાધિકારો ફોટો સેસન કરી રવાના થયા હતા. આ અંગે લોકોમાંથી ચર્ચાતી વિગત અનુસાર સરકારે બાળકોના વેકસીન અંગે ઓચિંતી જાહેરાત કર્યા બાદ પ્રચાર પ્રચાર પ્રસારમાં તંત્રનો પન્નો ટૂંકો પડતા કાર્યક્રમનો ફિયાસ્કો થયો હતો. જેને લઈને અનેક સવાલો ઉભા થયા હતા. ત્યારબાદ 12 વાગ્યા બાદ બાળકો રસી લેવા પહોંચ્યા હતા.

ઉલ્લેખનીય છે કી જામનગરમાં બાળકોને રસી માટે 12 કેન્દ્રો ફાળવવામાં આવ્યા છે. અને તમામ કેન્દ્રો પર 600 જેટલા રસીના ડોઝ ફાળવવામાં આવ્યા છે. કોરોના રસીકરણ માટે વિધાર્થી / વિધાર્થીનીઓ ઓનલાઈન એપોઈંટમેન્ટ અથવા સ્થળ પર ઓનસાઈટ રજીસ્ટ્રેશન કરાવીને રસી મેળવી શકશે. શાળામાં અભ્યાસ ન કરતા હોય તેવા બાળકો નજીકની શાળા કે આરોગ્ય સંસ્થાનાં રસીકરણ સેશનમાં રસી મેળવી શકશે.