જી.જી.હોસ્પિટલમાં દર્દીઓની સંખ્યા વધતા આક્સિજનની માંગ 50 હજાર લીટરે પહોંચી

કોરોનાના દર્દીઓને ઓક્સિજનની દૈનિક 10 લીટરથી લઇને વધુની જરૂરીયાત ઉભી થઇ

જામનગર તા.21:

જામનગરમાં કોરોનાનું દિવસેને દિવસે સંક્રમણ વધતુ જાય છે અને હોસ્પિટલમાં દાખલ થયેલા દર્દીઓના શ્ર્વાસ ખુટી રહ્યા છે. દૈનિક 50થી વધુ લોકો મૃત્યુંને ભેટી રહ્યા છે. રેકર્ડબ્રેક 484થી વધુ કેસ જામનગરમાં નોંધાઇ રહ્યા છે અને મોટાભાગના દર્દીઓને ઓક્સિજની જ કમી સર્જાતી હોય છે ત્યારે દૈનિક 50 હજાર લીટરથી વધુની જરૂરીયાત ઉભી થઇ છે. જામનગરની જી.જી. હોસ્પિટલમાં કોરોનાના પ્રકોપથી સૌરાષ્ટ્રભરના દર્દીઓએ જામનગર તરફ દોટ મૂકતા જી.જી. હોસ્પિટલની હાલત કફોડી બની છે. 1235ની ક્ષમતાવાળી હોસ્પિટલમાં 2000 જેટલા દર્દીઓ દાખલ થઈ ગયા છે જેમાં 40 ટકા જેટલા જામનગર સિવાયના જિલ્લાઓના છે ત્યારે દૈનિક ઓક્સિજનની જરૂરીયાતમાં દિન-પ્રતિદિન વધારો થઇને દર્દીઓની સંખ્યા વધતા હવે ઓક્સિજનની જરૂરીયાત 50 હજાર લીટરે પહોંચી છે.

હજુ ગત 8-4ના રોજ જી.જી. હોસ્પિટલને ઓક્સિજનની ફક્ત 16000 લીટરની જરૂરત દૈનિક રહેતી હતી, દર્દીઓના ધસારાથી હવે આ જરૂરિયાત 50000 લીટર દૈનિક પર પહોંચી છે. હોસ્પિટલ સ્ટાફના 20 લોકો સતત 24 કલાક ઓક્સિજન પૂરું પાડવાની કપરી કામગીરી બજાવી રહ્યા છે. ઓક્સિજનની વ્યવસ્થા કલેકટર તંત્ર દ્વારા કરવામાં આવે છે. તંત્ર હજુ પણ ઓક્સિજનની માત્રા વધારવામાં લાગ્યું છે જેના માટે હજુ થોડા દિવસનો સમય લાગશે.

જી.જી. હોસ્પિટલમાં કોરોના દર્દીઓ વધતા તેમજ ઓક્સિજનની માંગ પણ વધતા તંત્ર દ્વારા તાબડતોબ જી.જી. હોસ્પિટલમાં નવી ટેન્ક ઉભી કરવામાં આવી રહી છે જેની ક્ષમતા 10 કિલો લીટરની છે. આ ઉપરાંત ડેન્ટલ હોસ્પિટલમાં પણ 6 કિલો લીટરની ટેન્ક બનાવવામાં આવી રહી છે. તેમજ આયુર્વેદ હોસ્પિટલમાં પણ ટેન્કનું નિર્માણ કામ ચાલી રહ્યું છે.