જામનગરમાં 24 કલાકમાં કોરોનાના 308 કેસ: 173 ડિસ્ચાર્જ

જામનગર શહેરમાં 2704 લોકોના ટેસ્ટમાંથી 189 અને ગ્રામ્ય વિસ્તારમાં 1898 લોકોના ટેસ્ટમાંથી 119 વ્યક્તિ કોરોના સંક્રમિત નોંધાઇ

જામનગર તા.14

જામનગર શહેર અને ગ્રામ્ય વિસ્તારને ધમરોળવાનું સતત ચાલુ રાખ્યું હોય તેમ કોરોનાના કેસની સંખ્યા ગઇકાલે પણ ત્રેવડી સદી નોંધાઇ હતી. ગઇકાલે પણ કોરોનાના 308 કેસ નોંધાયા હતાં. જ્યારે 173 દર્દીઓ સ્વસ્થ થયા હતાં. કોરોના કાળના સમયગાળા દરમિયાન અત્યાર સુધીના સૌથી વધુ પોઝીટીવ કેસ ગઇકાલે નોંધાયા હતાં.

જામનગરમાં કોરોનાનું સંક્રમણ સતત વધી રહ્યું છે. જામનગર શહેરની વાત કરીએ તો ગઇકાલે 2704 લોકોનો કોરોના ટેસ્ટ કરવામાં આવ્યો હતો. ટેસ્ટીંગ વધવાની સાથે કોરોનાએ પણ તેનો કલર બતાવ્યો હતો અને ગઇકાલે પોઝીટીવ કેસનો આંક બેવડી સદી નજીક 189 થયો હતો. આટલી મોટી સંખ્યામાં પોઝીટીવ કેસ જાહેર થવાની બીજી તરફ ગઇકાલે જામનગર શહેરના માત્ર 99 દર્દીઓ કોરોનાને મ્હાત આપી ડિસ્ચાર્જ થયા હતાં. ગઇકાલ સુધીમાં જામનગર શહેરમાં 2,78,362 લોકોનો કોરોના ટેસ્ટ થયો છે.

જામનગર ગ્રામ્યમાં ગઇકાલે સર્જાયેલી સ્થિતિને પગલે આરોગ્ય તંત્રમાં તેમજ ગ્રામ્ય પ્રજામાં પણ કોરોનાના કહેર સામે ભયની લાગણી ઉભી થઇ છે. ગઇકાલે જામનગરના ગ્રામ્ય વિસ્તારોમાં 1898 લોકોનો કોરોના ટેસ્ટ કરવામાં આવ્યો હોવા છતાં આ પૈકી 119 દર્દીઓ કોરોના સંક્રમિત હોવાનું જાહેર કરવામાં આવ્યું હતું. આ સામે ગ્રામ્ય વિસ્તારના 74 દર્દીઓ ગઇકાલે સ્વસ્થ બનીને ડિસ્ચાર્જ મેળવી શક્યા હતાં. જામનગર ગ્રામ્યમાં પણ ગઇકાલે કોરોનાના સૌથી વધુ કેસ જોવા મળ્યાં હતાં અને તેને કારણે કુલ કેસ પણ સૌથી વધુ રહ્યાં હતાં.

આમ ગઇકાલે જામનગર શહેર અને ગ્રામ્ય વિસ્તારમાં મળીને કુલ 4602 લોકોનો કોરોના ટેસ્ટ કરવામાં આવ્યો હતો. આ પૈકી ગઇકાલે કુલ 308 લોકોનો કોરોના રિપોર્ટ પોઝીટીવ આવ્યો હતો. જ્યારે કોરોનાગ્રસ્ત 173 દર્દી  ગઇકાલે સ્વસ્થ થઇ ડિસ્ચાર્જ થયા હતાં.

જામનગર શહેર અને ગ્રામ્યમાં અત્યાર સુધીમાં કુલ 4,99,710 ટેસ્ટ થયા છે. જેમાં જામનગર શહેરમાં 2,78,362 અને જામનગર ગ્રામ્યમાં 2,21,348 ટેસ્ટનો સમાવેશ થાય છે. ગઇકાલ સુધીમાં જામનગર શહેર અને ગ્રામ્યમાં મળીને કુલ 13900 થી વધુ પોઝીટીવ કેસ નોંધાઇ ચુક્યાં છે અને 1500 થી વધુ લોકોના કોવિડ હોસ્પિટલમાં મૃત્યું થઇ ચુક્યાં છે.