કોરોનાને મ્હાત આપી પત્રકાર જગત રાવલે કરી ઘર વાપસી

જામનગર તા.28:
સાંજ સમાચારના જામનગર ખાતેના પત્રકાર જગતભાઇ રાવલે કોરોનાને મ્હાત આપી આજે ઘર વાપસી કરી હતી. આજે સવારે સાંજ સમાચાર-જામનગર ઓફિસની ટીમે તેઓને તંદુરસ્ત-નિરોગી જીવન માટે સરપ્રાઇઝ શુભકામના પાઠવી હતી.
જામનગર સાંજ સમાચારની પત્રકાર ટીમના સદસ્ય જગતભાઇ રાવલને તેમના પત્નીની મેડીકલ ઇમરજન્સી (મણકાની ગાદીના ઓપરેશન)માટે અમદાવાદ જવું પડયું હતું. કમનશીબે અમદાવાદથી પરત ફર્યા પછીના ત્રણ દિવસ બાદ તેમનો કોરોના અંગેનો રિપોર્ટ પોઝીટીવ આવ્યો હતો. આથી તેમને સારવાર માટે ગુરૂ ગોવિંદસિંઘ કોવિડ હોસ્પિટલમાં દાખલ કરવામાં આવ્યા હતા. 10 દિવસની સારવાર બાદ કોરોનાને મ્હાત આપી પત્રકાર જગતભાઇ રાવલ હોસ્પિટલમાંથી ડિસ્ચાર્જ થઇ સ્વસ્તી ઇન હોટલમાં એક સપ્તાહ કવોરેન્ટાઇનમાં રહ્યા હતા.
આજે તેઓ સવારે 11 વાગ્યા બાદ હોટલેથી ઘરે જવા રવાના થયા હતા. તેઓ ઘરવાપાસી કરે તે પહેલા સવારે 9 વાગ્યે જામનગર સાંજ સમાચાર ઓફિસની ટીમ તેઓને સરપ્રાઇઝ શુભેચ્છા આપવા હોટલ પહોંચી હતી. ટીમના સાથીદારોને જોઇ જગતભાઇ પણ ભાવવિભોર થઇ ગયા હતા. જગતભાઇને ફૂલહાર અને ચોકલેટ આપી શુભકામના પાઠવાઇ હતી.
કોરોના વોરિયર્સ જગત રાવલ આજે સવારે ઘરે પહોંચતા પરિવારના સભ્યો તથા બ્રહ્મ સમાજના અ્રગણીઓ અને શુભેચ્છક મિત્રોએ પુષ્પવૃષ્ટિ કરી કોરોના સામેની જગતભાઇની જીતને વધાવી હતી.