મુંબઇથી આવેલા વધુ એક પ્રવાસીનો રિપોર્ટ પોઝીટીવ

મુંબઇથી આવ્યા બાદ સમરસ હોસ્ટેલ ખાતે ક્વોરેન્ટાઇનમાં હોવાથી લોકલ સંક્રમણ અટક્યું: જામનગર જિલ્લામાં કોરોનાના કુલ કેસનો આંક વધીને 47 થયો: 80 ટકાથી વધુ કેસમાં ટ્રાવેલ હિસ્ટ્રી જવાબદાર

જામનગર તા. 25 :
જામનગરમાં બે દિવસ બાદ કોરોનાનો વધુ એક પોઝીટીવ કેસ નોંધાયો છે. મુંબઇથી આવેલા આઘેડ કોરોના સંક્રમીત હોવાનું રિપોર્ટમાં જાહેર થયું છે. જો કે, તેઓને સીધા સમરસ હોસ્ટેલમાં ક્વોરેન્ટાઇન કરાયા હોય શહેરમાં પ્રવેશ કર્યો ન હોવાથી તંત્ર અને શહેરીજનોએ રાહત અનુભવી છે. શહેરના અન્ય 69 અને દેવભૂમિ દ્વારકા સહીત અન્ય જિલ્લાના 95 સેમ્પલના રિપોર્ટ નેગેટીવ આવ્યા છે. લોકડાઉન-4 માં મહતમ છૂટછાટથી અન્ય શહેરોમાં કોરોનાના પોઝીટીવ કેસમાં ઉછાળો આવ્યો છે ત્યારે જામનગરમાં છેલ્લાં બે દિવસમાં કોરોનાનો એકપણ પોઝીટીવ કેસ નોંધાયો ન હતો.
શનિવારે જામનગરના 70  શંકાસ્પદ દર્દીના રિપોર્ટ પેન્ડીંગ રહ્યા હતાં. જે રવિવારે સવારે આવતા 1 દર્દીનો રિપોર્ટ પોઝીટીવ આવ્યો હતો. શહેરના ભીમવાસ વિસ્તારમાં રહેતા આધેડ મુંબઇથી આવ્યા હોય તેને સીધા સમરસ હોસ્ટેલમાં ક્વોરેન્ટાઇન કરવામાં આવ્યા હતાં. જેનો રિપોર્ટ પોઝીટીવ આવ્યો હતો. આ દર્દી શહેરમાં પ્રવેશ્યા ન હોય તંત્ર અને શહેરીજનોએ રાહત અનુવભી છે. જયારે અન્ય 69 શંકાસ્પદ દર્દીના રિપોર્ટ નેગેટીવ આવ્યા હતાં. જયારે રવિવારે સવારે દેવભૂમી દ્વારકાના 36 અને મોરબીના 59 દર્દીના સેમ્પલ જી.જી.હોસ્પિટલમાં ચકાસણી અર્થે આવ્યા હતાં. જે તમામના રિપોર્ટ નેગેટીવ આવ્યા હતાં. બીજી બેચમાં જામનગરના 31 અને પોરબંદર જિલ્લાના 38 સેમ્પલ ચકાસણી અર્થે આવ્યા હતાં. જે 69 રિપોર્ટ બાકી રહ્યા છે. હાલ જી.જી.હોસ્પિટલમાં 12 કોરોના પોઝીટીવ દર્દી સારવારમાં છે.
જામનગર શહેર-જિલ્લામાં બહારથી આવતા લોકોને જુદા જુદા કેન્દ્રમાં ક્વોરેન્ટાઇન કરવામાં આવે છે. 24 મેની સ્થિતિએ જામનગરની સમરસ હોસ્ટેલમાં 101, ગ્રામ્ય વિસ્તારમાં ઉભા કરવામાં આવેલા કેન્દ્રમાં 8596 અને ખાનગી કેન્દ્રમાં 75 મળી કુલ 8752 લોકો ક્વોરેન્ટાઇનમાં હોવાનું નોંધાયું છે.