હાપા માર્કેટીંગ યાર્ડ આવતી કાલથી ખેડુતો માટે ફરી ધમધમતું બનશે

કપાસ, તલ, મગ, તુવેર, અળદ, મઠ,મેથી, બાજરો સહિતની આવક શરૂ

જામનગર તા.25 :
જામનગર ખેતીવાડી ઉત્પન બજાર સમિતિ હાપા ખાતે શનિવારના રોજ ચણા, ઘઉં, ધાણા, મગની હરરાજીમાં ખેડુતો આવ્યા હતાં. માર્કેટીંગ યાર્ડના સેક્રેટરી હિતેષ પટેલે જણાવ્યું હતું કે, યાર્ડ ખાતે ધાણાની હરરાજી માટે 100 ખેડુતોને જેમાંથી 96 ખેડુતો પોતાના ધાણાના વેંચાણ માટે આવ્યા હતાં. યાર્ડ ખાતે ધાણાની આવક 2196 ગુણીની નોંધાઇ હતી. ધાણાનો ભાવ મણનો રૂા. 750 થી 1320 રહ્યો હતો.
સોશ્યલ ડિસ્ટન્સ અને સરકારની લોકડાઉનની ગાઇડ-લાઇનના અમલ વચ્ચે જામનગર માર્કેટીંગ યાર્ડ ધમધમી રહ્યું છે. એટલું જ નહીં ખેડુતોને પણ પોતાની જણસીનું વ્યાજબી ભાવ સંતોષકારક રીતે મળી રહ્યો છે. તેવા સમયે ખેડુતોનો માલ ખરીદવા માટે વેપારીઓ અને કમિશ્ન એજન્ટો પણ ખરીદી કરવા હરરાજીમાં આવી પહોંચે છે. યાર્ડ ખાતે દૈનિક 315 જેટલા ખેડુતો હરરાજીમાં પોતાનો ખેત માલ લઇને આવી પહોંચે છે.
યાર્ડ ખાતે ઘઉંની હરરાજી માટે 175 ખેડુતોને બોલાવવામાં આવે જેમાંથી 110 જેટલા ખેડુતો ઘઉં લઇને આવ્યા હતાં. યાર્ડ ખાતે ઘઉંની આવક 15640 મણ નોંધાઇ હતી. ઘઉંના મણનો ભાવ રૂા. 335 થી 365 વચ્ચે રહ્યો હતો.
યાર્ડ ખાતે મગની હરરાજી માટે 80 ખેડુતોને બોલાવવામાં આવેલ જેમાંથી માત્ર 40 ખેડુતો એટલે કે 50 ટકા ખેડુતો આવ્યા હતાં. યાર્ડમાં 540 મણ એટલે કે 442 ગુણી મગની આવક નોંધાઇ હતી. જયારે મગનો ભાવ મણનો રૂા. 1160 થી 1340 વચ્ચે રહ્યો હતો.
યાર્ડ ખાતે ચણાની હરરાજી માટે 100 ખેડુતોને જાણ કરવામાં આવેલ જેમાંથી માત્ર 69 ખેડુતો જ આવ્યા હતાં. ત્યારે ચણાની આવક 1996 ગુણીની નોંધાઇ હતી. જયારે ચણાનો ભાવ રૂા.772 થી 818 રહ્યો હતો.
જામનગર ખેતીવાડી ઉત્પન બજાર સમિતિ હાપા ખાતે સોમવારની ઇદની જાહેર રજા હોવાથી યાર્ડ બંધ રહ્યું હતું. મંગળવારના રોજ અજમા, ધાણા, લસણ, ઘઉં, કપાસ સહિતની આવક થનાર છે. યાર્ડ ખાતે સવારે 6-30 થી 10 વાગ્યા દરમ્યાન કપાસની આવક થશે. જયારે તલ, મગ, અળદ, બાજરો, તુવેર, મઠ, મેથી, ચોરી, મરચા, મગફળીની હરરાજી માટે આવકનો સમય રાત્રે 8 થી 12 વાગ્યા સુધી રહેશે. આમ જામનગર માર્કેટીંગ યાર્ડમાં હવે ખેડુતોને પોતાના ખેત ઉત્પાદન વેંચવા માટે ઓપન આવકની પ્રક્રિયા શરૂ કરવાની જાહેરાતથી ખેડુતમાં આનંદની લાગણી ફેલાઇ છે.