જામનગરમાં સાંજ ઢળતા જ શહેરમાં છવાતો સન્નાટો

જામનગરમાં કોરોના વાયરસના કેસોનું પ્રમાણ વધતા જાહેરનામાનું ચુસ્તપણે અમલ થાય તે માટે જરૂરી  પગલા લેવામાં આવ્યા છે તેમજ જીવનજરૂરીયાતની ચીજ વસ્તુ સિવાયની દુકાન, ઓફીસ વગેરે બંધ કરવાનું જાહેરનામું બહાર પાડવામાં આવ્યું છે. જેમાં દુધની દુકાન, ફેરિયાઓ સવારે 7 થી 1  અને સાંજે 5 થી 7 વાગ્યા દરમ્યાન  જયારે કરિયાણાની દુકાન માત્ર સવારના 7 થી 10 વાગ્યા દરમ્યાન જ ખુલ્લી રાખવાના આદેશ કરવામાં આવ્યા છે. જેને લઈને શહેરમાં દિવસ દરમ્યાન જીવન જરૂરિયાતની ચીજ વસ્તુ લેવા માટે શહેરમાં લોકોની ચલપહલ જોવા મળે છે જયારે સાંજ થતા જ શહેરભરમાં સન્નાટો છવાઈ જાય છે. કામ વગર નીકળતા લોકો સામે પોલીસ પણ લાલ આંખ કરતી હોય જામનગરના રસ્તાઓ ઉપર સન્નાટો છવાઈ જાય છે. જ્યારે શહેરની બજારો પણ બંધ રહેતી હોય શહેરની બજારો સુમસામ ભાસે છે. શહેરમાં બપોર સુધી માર્ગો ઉપર લોકોની અવરજવર જોવા મળે છે. જ્યારે સાંજ થતા જ ફરી શહેરના માર્ગો સહીત શેરી ગલીઓ પણ સુમસામ બની જાય છે. કોરોના વાયરસના આક્રમણ પહેલા શહેર ધમધમતું હતું, બજારો પણ મોડી રાત સુધી ખુલ્લી રહેતી હતી. લોકો પણ પોતાના પરિવાર સાથે હરવા- ફરવા નીકળતા હતા. બગીચાઓમાં બાળકોનો કલબલાટ જોવા મળતો હતો તે બગાચાઓ પણ આજે સુમસામ ભાસી રહ્યા છે. કોરોના વાયરસે જાણે કે સમગ્ર શહેરને કાબુમાં લીધું હોય તેમ તેના ભયના કારણે અને કોરોના વાયરસનું સંક્રમણ અટકે તે માટે લોક ડાઉન કડક કરવામાં આવ્યું છે. પહેલા જયારે લોકો સાંજે પોતાના પરિવાર સાથે ફરવા નીકળતા હતા જયારે આજે લોક ડાઉનને કારણે લોકો ઘરમાં જ પુરાઈ રહે છે અને શહેરમાં છવાઈ જાય છે સન્નાટો.