કોરોના વોરિયર્સના બાળકના જન્મદિવસની પોલીસ સ્ટાફ દ્વારા ઉજવણી

જામનગર તા.7

દેશભરમાં કોરોનાની મહામારીએ માજા મુકી છે. આ મહામારી સામે હાલ તંત્ર લડવૈયાની ભૂમિકામાં છે. કોરોના સામેના જંગમાં અનેક વોરિયર્સ દ્વારા પોતાના સમયનું બલિદાન આપવામાં આવી રહ્યું છે. જામનગરનું આવું જ એક દંપતિ ફરજ પરસ્તીમાં જામનગર બહાર છે. પોતાના પુત્રનો પ્રથમ જન્મદિવસ ઉજવવા પણ આ વોરિયર્સને સમય સંજોગે સમય ન મળ્યો. પોલીસે આ વોરિયર્સની ફરજ પરસ્તીને બિરદાવી, ઘરે પહોંચી, બાળકના નાના-નાની સાથે જન્મદિવસની ઉજવણી કરી દંપતિની ફરજ નિષ્ઠાને બિરદાવી છે.

જ્યારથી દેશમાં કોરોના સંક્રમણનો ખતરો ઉભો થયો છે ત્યારથી દેશમાં લોકડાઉન અમલમાં આવ્યું છે. વહીવટી તંત્ર, આરોગ્ય તંત્ર અને પોલીસ તંત્ર દ્વારા કોરોનાને માત આપવા માટે લડાઇ ચલાવવામાં આવી રહી છે. આપણા રાજ્યમાં ઠેર-ઠેર કોરોના વોરિયર્સ પોતાની ફરજ અદા કરી રહ્યાં છે. અનેક વોરિયર્સ પોતાના પરિવારથી દૂર રહી આવી પડેલી આફત સામે લડાઇ લડી રહ્યાં છે. ત્યારે જામનગરમાં આરોગ્ય તંત્ર સાથે સંકળાયેલ દંપતિ હાલ વોરિયર્સની ભૂમિકા ભજવી રહ્યું છે. પોતાના એક વર્ષના માસુમ પુત્રને પરિવારને સોંપી બાળકના પિતા પડઘરી ખાતે તો મમ્મી ભૂજની અદાણી હોસ્પિટલમાં સેવા આપી રહી છે. હાલ જામનગરમાં નાના-નાની આ બાળકમાં બાળપણના સંસ્કારોનું સિંચન કરી રહ્યા છે. આજે આ માસુમનો બાળકનો પ્રથમ જન્મદિવસ હોવા છતાં પણ માતા-પિતા હાજર રહી શક્યાં  ન હતાં પરંતુ આ બાબતે પોલીસને જાણ થતાં તેઓએ જન્મદિવસ ઉજવણીનું બીડુ ઝડપી લીધું.

બાળકના માતા-પિતા હાલ વોરિયર્સની ભૂમિકામાં છે. પોતાના માસુમ પુત્રનો આજે પ્રથમ જન્મદિવસ હોવા છતાં પણ દંપતિ પોતાની ફરજ પરસ્તીમાં વ્યસ્ત છે. આ બાબતની જામનગર પોલીસને જાણ થતાં એ માસુમનો જન્મદિવસ ઉજવવા ઘર સુધી પહોંચ્યાં હતાં. આઇપીએસ સાફીન હસન અને એલસીબી, એસઓજીની ટીમ ઘરે પહોંચી કેક કાપી બાળકના જન્મદિવસની ઉજવણી કરી હતી. સાથે સાથે પોલીસ દ્વારા કોરોના વોરિયર્સની ભૂમિકામાં રહેલાં માતા-પિતાની પણ પ્રશંસા કરી હતી, તો બીજી તરફ નાના-નાનીએ પણ પોતાની આ ફરજ હોવાનો ભાવ દર્શાવ્યો છે.