જામનગરમાં દારૂના વ્યસની એવા પુત્રએ વૃધ્ધ પિતાની કરપીણ હત્યા નિપજાવી

કામધંધો કરવા બાબતે અવાર-નવાર બોલાચાલી થતી હતી : ગત રાત્રે પુત્રએ ઝઘડો કરી પિતાનું ઢીમ ઢાળી દીધું 
જામનગર તા.

જામનગરમાં ગઇકાલે મોડી રાત્રે ગુલાબનગર વિસ્તારમાં કપાતર પુત્રના હાથે પિતાની કરપીણ હત્યા નિપજાવ્યાનો બનાવ સામે આવતા ચકચાર મચી જવા પામી છે. કંઇ કામ ધંધો ન કરતા પુત્રને પિતાએ ધંધો કહેવાનું કહેતાં ઝઘડો કરી છરી વડે હુમલો કરી કરપીણ હત્યા નિપજાવી હોવાની આરોપીની માતાએ જ પોલીસમાં ફરિયાદ નોંધાવી છે. દારૂ પીવાના વ્યસની એવા પુત્રએ પિતાની હત્યા નિપજાવી ઘર છોડી દીધું હોવાની વિગતો સામે આવી છે.
જામનગરમાં ગુલાબનગર વિસ્તારમાં યોગેશ્ર્વરનગર શેરી નં. 2 માં રહેતા દ્વારકાદાસ કાનદાસ ગોંડલીયા (ઉ.વ.60) નામના વૃદ્ધ પર તેમના જ કપાતર પુત્ર દિપક ઉર્ફે મુન્નીયો દ્વારકાદાસ ગોંડલીયાએ છરી વડે હુમલો કરી છરીનો એક ઘા છાતીના ભાગે મારી ગંભીર ઇજા પહોંચાડી હતી. આ બનાવ અંગે પરિવારના સભ્યોએ જાણ કરતા 108 ની ટીમ ઘટના સ્થળે દોડી ગઇ હતી. જો કે, વૃદ્ધને સારવાર મળે તે પુર્વે જ મૃત્યું નિપજતા આ બનાવ હત્યામાં પલ્ટાયો હતો. મોડી રાત્રે 11 વાગ્યે ઘટેલી આ ઘટના બાદ આરોપી તુરંત નાશી છુટ્યો હતો. બીજી તરફ આ બનાવને લઇને સીટી એ ડીવીઝન પોલીસે ઘટના સ્થળે દોડી જઇ આગળની કાર્યવાહી હાથ ધરી હતી. આ બનાવની મૃતકની પત્ની અને આરોપીની માતા મંજુબેને સીટી એ ડીવીઝન પોલીસમાં આઇપીસી કલમ 302 જીપીએકટ 135(1) મુજબ ફરિયાદ નોંધાવી હતી. જેમાં કંઇ કામધંધો ન કરતો પુત્ર અવાર-નવાર દારૂ પિતો હોય જેથી કાંઇ કામધંધો કરવા બાબતે મૃતક પિતાએ તેને ઠપકો આપતા ઉશ્કેરાઇ જઇ હત્યા નિપજાવ્યાનું ફરિયાદમાં જાહેર કરાયું છે. આ બનાવ અંગે સીટી એ ડીવીઝન પી.આઇ. ટી.એલ. વાઘેલા સહિતના સ્ટાફે આરોપીની શોધખોળ હાથ ધરી છે.