જામનગર નજીક ઠેબા ચોકડી પાસે ગમખ્વાર અકસ્માતમાં બેના મોત, છ ઘવાયા

ઇકો અને છકડો રીક્ષા વચ્ચે અકસ્માત : ફરી વખત ઠેબા ચોકડી પાસેનો માર્ગ રક્તરંજીત

જામનગર તા.7

જામનગર નજીકના ઠેબા ચોકડી પાસેના માર્ગ પર વધુ એક જીવલેણ અકસ્માત સર્જાયો છે. જેમાં બે લોકોના સ્થળ પર જ મૃત્યુ નીપજ્યા છે. જયારે અન્ય છ વ્યક્તિઓને નાની મોટી ઈજાઓ પહોચતા હોસ્પિટલ ખસેડવામાં આવ્યા છે. આ બનાવના પગલે લોકોના ટોળા એકત્ર થઇ જતા પંચકોશી પોલીસે સ્થળ પર પહોચી બચાવ કાર્યવાહી હાથ ધરી છે.

જામનગર નજીક પખવાડિયા પૂર્વે જામજોધપુર પંથકના ચાર યુવાનોને બોલેરોએ ચગદી નાખ્યાના બનાવની હજુ શાહી સુકાય નથી ત્યાં આ જ સ્થળ નજીક આજે ગમખ્વાર અકસ્માત સર્જાયો છે. જેની વિગત મુજબ, આજે સવારે જામનગર નજીકના બાયપાસ રોડ પર આવેલ ઠેબા ચોકડી પાસે ઇકો અને છકડો રીક્ષા વચ્ચે ટક્કર થવા પામી હતી. જેમાં બે વ્યક્તિઓના સ્થળ પર જ મૃત્યુ નીપજયા હતા જયારે અન્ય  છ વ્યક્તિઓને ઈજાઓ પહોચતા તાત્કાલિક 108માં જી.જી.હોસ્પિટલ ખસેડવામાં આવ્યું છે. જેમાના ત્રણની હાલત ગંભીર ગણાવાઈ રહી છે. આ બનાવના પગલે ટ્રાફિક જામ થઇ જતા અને લોકોના ટોળા એકત્ર થઇ જતા પંચકોશી પોલીસે સ્થળ પર પહોચી ઘાયલોને હોસ્પિટલ પહોચાડવા અને ટ્રાફિક દુર કરવા સહીતની આગળની કાર્યવાહી હાથ ધરી હતી. આ બનાવની વધુ વિગતો મેળવાઈ રહી છે.

આ અકસ્માતમાં મૃત્યું પામેલમાં મોડપર ગામના 60 વર્ષના પ્રેમજીભાઇ નામની વ્યક્તિ તેમજ ઇજા પામનારમાં વીજરખી ગામના શહેનાઝબેન જુનેદભાઇ બધડા, આરઝુબેન સલીમભાઇ લાખાણી અને નસીમબેન રફીકભાઇ મલેકનો સમાવેશ થાય છે.